 |
Beren udalerrietan Tokiko Agenda 21 ezarri
nahi duten eta udalerrien arteko esperientzia
eta informazioa trukatu nahi duten herriak,
Udaltalde 21 izeneko taldetan biltzen dira.
Landa Eremuko Udaltalde 21 Pilotua ordea berezia
da, izan ere landa eremuko udalerrietan Tokiko
Agenda 21 ezartzeko, bertako izaerari eta
berezitasunei egokitutako metodologia lantzeko
helburuarekin sortu da. Orain arte
Tokiko Agenda 21 ezartzeko garatu eta aplikatu
den metodologia hiriei zuzendua dago,
eta landa eremuetan ekin diren saioetan ikusi
da metodologia hau ez zaiola ondo egokitzen
hiritarra ez den errealitate horri.
Hala ere, landa eremuak garrantzi
estrategiko bizia du ondoko arrazoiengatik,
besteak beste:
• Biztanleriari dagokionez dentsitate
eta kopuru txikiak dituen arren, landa
eremuak azalera handia hartzen du.
• Gizarteak bereziki baloratzen duen
kultura eta natura ondarearen gordailu
da.
• Nekazaritza eta abeltzaintzari lotutako
erabileren etorkizunak neurri handian baldintzatzen
du landa eremuaren balioen kontserbazioa.
Metodologia berri bat
 Landa
eremuko udalerrien beste ezaugarri batzuk
metodologia berri bat lantzeko beharra
nabarmentzen dute, hala nola:
• Udaletxeek baliabide urriak
dituzte, hirikoen aldean. Orokorrean,
idazkaria izaten da udal langile finko bakarra,
eta bestelako behar teknikoak aholkularitza
kontratuen bidez betetzen dira. Alkateak eta
zinegotziek ere udaletxetik kanpo izaten dituzte
beren lanak. Guzti honek udal ekipoarekin
harremana, bere inplikazioa, eta ekintzak
martxan jartzeko gaitasuna zailagoa egiten
du. Biztanleriaren dentsitatea txikia izanik,
baliabide ekonomikoak ere mugatuak dira, baita
hirian ohizkoak diren beste zerbitzu asko.
• Biztanleriaren zati handi batek nekazaritza
ustiategietan lanean jardutean, gehienetan
baserri mistoetan, ez du asti handirik,
beraz oztopo berriak daude partaidetza bideratzeko.
• Herri txikietan ingurumen arazoak
ez dira oso nabarmenak izaten. Gizarte
eta ekonomia arloek, berriz, garrantzia berezia
hartzen dute inguru honetan.
• Bizilekuen dentsitate baxua
eta bizitokien sakabanaketa, komunikazioan
eta partaidetzan zailtasunak sortuz.
• Hizkuntzaren aldetik, euskara nagusitzen
da, baina lengoaiari dagokionez, prozesuan
parte hartu beharko duten askok ez
dute euskara batua menderatzen, maila
teknikoan, bederen. Datu hau bereziki kontuan
izan behar da komunikazioko ekintzak eta lan
egitaraua lantzean.
• Teknologia berrien erabilera
mugatua da oraindik, baina potentzial
handia eskaintzen dute Agenda 21 ezartzeko
prozesuan.
Landa Eremuko
Udaltalde 21 Pilotua osatzen duten lau
udalerriak Albiztur, Alkiza, Bidegoian
eta Larraul dira. Proiektuaren berezitasunak
kontuan hartuta, erakunde desberdinen
inplikazioa eta elkarlana behar beharrezkoak
direnez, guzti hauek parte hartzen dute:
• Ihobe
(Eusko Jaurlaritzako Ingurumen eta Lurralde
Antolamenduko Saileko sozietate publikoa,
ingurumen jarduketarako).
•
Gipuzkoako
Foru Aldundiko Garapen Iraunkorreko
Departamentua.
•
Mendikoi
(Eusko Jaurlaritzako Nekazaritza eta
Arrantza Saileko sozietate publikoa,
landa eremuko heziketa, sustapena eta
garapenerako).
• Tolomendi
(Tolosaldeko landa garapenerako elkartea).
• Albiztur,
Alkiza,
Bidegoian
eta Larraulgo
Udalak. |
|
 |
|
|
